Një ngjarje e rëndë ka ndodhur sot në orët e hershme të mëngjesit në Gjakovë, ku një person ka humbur jetën si pasojë e plagëve të marra nga një mjet i mprehtë.
Lajmin e ka konfirmuar për tëvë1.info, zëdhënësi i policisë për rajonin e Gjakovës, Sheremet Elezaj.
Elezaj ka njoftuar se viktima fillimisht është dërguar për trajtim në QKMF, ndërsa më pas është transferuar në Spitalin e Përgjithshëm në Gjakovë, ku edhe ka ndërruar jetë si pasojë e lëndimeve.
Sipas policisë, i dyshuari gjendet në arrati.
Njësitë policore kanë dalë menjëherë në vendin e ngjarjes dhe në konsultim me Prokurorin e Shtetit, rasti është iniciuar si “vrasje”.
Autoritetet janë duke ndërmarrë të gjitha veprimet e nevojshme hetimore për zbardhjen e plotë të rastit.
“Sot, në orët e hershme të mëngjesit jemi njoftuar se një person i moshës madhore është dërguar për trajtim mjekësor si pasojë e lëndimeve të shkaktuara nga një mjet i mprehtë. Fillimisht ishte dërguar në QKMF dhe më pas në Spitalin e Përgjithshëm në Gjakovë, ku edhe ka ndërruar jetë. Bazuar në hetimet fillestare dyshohet se rreth orës 02:20 pas një mosmarrëveshje në rrugën “Mbretëresha Teutë” në Gjakovë, viktima është sulmuar nga një person, po ashtu i moshës madhore, i cili ndodhet në arrati. Njësitë kompetente policore menjëherë kanë dalë ne vendin e ngjarjes dhe, në konsultim me Prokurorin e Shtetit, është iniciuar rast “vrasje”. Aktualisht janë duke u ndërmarrë të gjitha veprimet e nevojshme operative dhe hetimore për zbardhjen e plotë të rrethanave të rastit”, ka njoftuar Elezaj./teve1.info/
