Një ngjarje e rëndë ka tronditur sot fshatin Gollubovc të Malishevës, ku një person ka vrarë dy të tjerë, të cilët janë vëllezërit e bashkëshortes së tij. I dyshuari, i identifikuar si Astrit Isufi, është në arrati dhe po kërkohet nga organet e rendit.
Zyrtarja për informim e Prokurorisë Themelore në Prishtinë, Kaltrina Shala, ka konfirmuar për Tëvë1 se personi i dyshuar ishte tashmë i njohur për drejtësinë dhe kishte qenë nën hetim për dy vepra penale.
“Lidhur me pyetjen tuaj, ju njoftojmë se prokurori i shtetit ndaj personit të dyshuar A.I., më datë 06.04.2025, ka paraqitur kërkesën për caktimin e masës së paraburgimit, e cila po të njëjtit iu është caktuar nga gjykata kompetente. Po ashtu, më datë 07.04.2025, Prokuroria Themelore në Prishtinë ka ngritur aktakuzë ndaj të pandehurit për veprat penale ‘Dhunë në familje’ sipas nenit 248 të Kodit Penal të Republikës së Kosovës dhe ‘Kanosje’ sipas nenit 181 të KPRK-së,” – ka deklaruar Shala.
Sipas të dhënave të prokurorisë, Isufi kishte qenë në paraburgim gjatë muajit prill të këtij viti, por nuk dihet ende se kur i është ndërprerë masa e sigurisë.
Pas kryerjes së krimit të sotëm, i dyshuari është arratisur nga vendi i ngjarjes, ndërsa Kryeprokurori dhe prokurori kujdestar ndodhen në terren për të udhëhequr hetimet fillestare.
Autoritetet kanë nisur një operacion kërkimi në zonë, ndërsa rasti po hetohet si vrasje e rëndë.
