E gjithë zënka nisi në këtë vend, i cili mbrëmjen e së hënës u kthye në skenë krimi.
Dyshohet se nga një mosmarrëveshje për parkimin e kësaj veture, ngjarja u kthye në një tragjedi.
Rreth orës 22:00 të së hënës, në rrugën Minatori këtu në Hajvali të Prishtinës, Xhemajl Nuhiu dyshohet që parkoi veturën me tabela të Mbretërisë së Bashkuar, afër shtëpisë së të ndjerit, M.M për çka dyshohet se ka filluar edhe zënka.
Televizioni merr vesh se ngjarja ndodhi edhe pranë familjarëve të cilët, nuk pranuan të flasin para kamerës, ndërkaq dëshmitarët mbrapa kamerës kanë thënë se i ndjeri me inicialet M.M ka qenë i moshës 41 vjeçare.
I dyshuari për këtë vrasje, Xhemajl Nuhiu është shpallur në kërkim edhe nga Policia e Kosovës pasi që i njëjti, ende është në arrati.
“Njësiti i hetimeve të përgjitshme që operon në kuadër të Drejtorisë Rajonale të Policisë në Prishtinë, me autorizim nga prokuroria kompetente, kërkon ndihmë nga qytetarët në ofrimin e informatave, të cilat do të ndihmonin në lokalizimin dhe arrestimin e personit të dyshuar për veprën vrasje që ka ndodhë mbrëmë në Hajvali. Personi i dyshuar XHEMAIL (BAJRAM) NUHIU ndodhet në arrati, andaj për çdo informatë që mund të çojë në identifikimin e vend-ndodhjes së tij, na kontaktoni”, kanë thënë nga Policia e Kosovës.
Detaje për rastin kanë dhënë edhe nga Prokuroria Themelore në Prishtinë.
“ Menjëherë pas marrjes së informatës, njësitet relevante të Policisë së Kosovës në bashkëpunim dhe koordinim me Prokurorin e shtetit kanë dalë në vendin e ngjarjes dhe kanë ndërmarrë të gjitha veprimet e nevojshme hetimore. Si rezultat i veprimeve të deritanishme hetimore, është identifikuar autori i dyshuar XH.N i cili aktualisht është në arrati dhe po kërkohet nga organet e rendit”, kanë thënë nga Prokuroria Themelore.
Kjo ishte vrasja e pestë në Kosovë brenda 48 orëve.
