Prokurorja e Prokurorisë Themelore të Pejës, Sahide Gashi përmes një konference për media ka njoftuar se ëshë ngritur aktakuzë për tragjedinë e Gllogjanit, ku ishin vrarë tre persona.
Aktakuza është ngritur ndaj Kastriot Mehmetajt dhe Kreshnik Mehmetajt, raporton teve1.info
“Ju njoftoj se pas hetimeve, Prokuroria sot me datë 5 maj ka ngritur aktakuzë kundër Kastriot Mehmetaj dhe Kreshnik Mehmetaj për veprën penale si bashkëkryer së vrasjes së rëndë”, u shpreh Gashi.
Ndërsa ndaj Halil Mehmetajt, Gashi ka thënë se është ngritur aktakuzë për vepren penale “shtytje në vrasje të rëndë”.
Prokurorja, Gashi deklaroi se pas të gjitha provave, fakteve e analizave forenzike dhe punës që është kryer gjatë këtyre muajve, ka dalë se targeti i të dyshuarve ishte shoferi i autobusit i cili ka mbetur i vdekur.
“Janë siguruar incizime të të gjitha kamerave përgjatë rrugëtimit të autobusit të sulmuar. Janë marrë intervistat e para me pasagjerët e mbijetuar të autobusit, është nxjerrë profili i kryerësit dhe personave e viktimave të këtij rasti, dhe kemi ardhur në përfundim preliminar pas grumbullimit të të gjitha informatave, kemi arritur që të konstatojmë me besueshmëri të lartë se nuk ka pasur indikacione të sulmit terrorist. Target i sulmit ka qenë shoferi i autobusit”, ka thënë prokurorja Gashi.
Tutje, prokurorja Gashi ka falënderuar familjarët e viktimave për bashkëpunimin dhe besimin ndaj prokurorisë.
Ndryshe, vrasja e trefishtë ka ndodhur më 26 nëntor të vitit 2021, në një sulm me armë drejt një autobusi në fshatin Gllogjan të Deçanit, ku të vdekur patën mbetur shoferi i autobusit dhe dy nxënës të shkollës së mesme./teve1.info
