Bashkimi i Sindikatave të Pavarura të Kosovës ka reaguar për sulmin ndaj Policisë së Kosovës, ku një polic është vrarë e një tjetër është plagosur.
BSPK u ka bërë thirrje autoriteteve të vendit dhe ndërkombëtarëve që të merren më seriozisht “me çështjen duke ua pamundësuar të papërgjegjshmëve ta prishin paqen, qetësinë duke krijuar gjendjen e pasigurisë”.
BSPK i ka shprehur ngushëllime familjarëve të policit të vrarë.
“Lajmi për humbjen e jetës së policit në veri të vendit është i trishtë dhe na thërret që policët nuk duhen lënë vetë. E i bëjmë thirrje autoriteteve të zbardhin rastin e trishtë që është më shumë se krim, se humbja e jetës së atyre që mbrojnë të drejtën në të mirë të qytetarit duhet mbrojtur dhe mbrojtur fuqishëm me të gjitha mjetet që pamundësojnë veprimin e grupeve kriminale e rendprishëse”, thuhet në njoftim./teve1.info/
