Brenda Qendrës për Punë Sociale në Komunën e Ferizajt u vra një grua.
Në katin e parë të kësaj ndërtese, dyshohet se 21-vjecarja u vra nga ish bashkëshorti i saj 36-vjeçar.
E trupi i pajetë u largua nga vendi i ngjarjes rreth tre orë më vonë.
Tëvë1 ka biseduar edhe me drejtoreshën e kësaj qendre, Adelina Rexhepi, e cila, prapa kamerave, tha se nuk ka pasur informacion për problemet në mes të viktimës dhe dorasit.
Sipas saj, ata kanë pasur edhe një fëmijë rreth moshës 1-vjecare.
E nga Policia e Kosovës kanë treguar se dorasi është arrestuar 30 minuta pas ngjarjes.
“Ekipe të policisë, policët e rendit, hetuesit e stacionit, hetuesit rajonal të mbështetura edhe nga Njësia e Reagimit të Shpejtë (NJRSH) kanë identifikuar të dyshuarin, i moshës 36 vjeçare dhe menjëherë kanë rrethuar zonën përreth dhe pas një pune intensive në terren , në orën 15:15 kanë arritur që të arrestojnë të dyshuarin e kësaj ngjarje dhe e kanë shoqëruar në Sektorin Rajonal të Hetimeve në Ferizaj, për procedura tjera hetimore”, ka thënë zëdhënësi i Policisë së Kosovës, Kanun Veseli.
Këtë e kanë konfirmuar edhe nga Prokuroria Themelore në Ferizaj.
“Brenda afatit ligjor, ndaj të njëjtit, Prokuroria Themelore në Ferizaj, do të parashtroj kërkesë për caktimin e masës së paraburgimit për veprën penale të lartëcekur”, thuhet nga prokuroria.
Bashkë me viktimën ishte dhe vëllai i saj i cili mbeti i plagosur në dorë.
Mjeku kujdestar në emergjencë të kësaj komune, Sefedin Fazliu ka treguar për gjendjen e të plagosurit 15 vjecar.
Ngjarja e 21 vjecares nga Ferizaj ka tronditur opinionin publik, për faktin se pos pasigurisë së grave në përgjithësi, kjo vrasje ka ndodhur dhe brenda një institucioni të shtetit siç është Qendra për Punë Sociale.
