23 janari i këtij viti, ishte tragjik për të riun Bekim Varin.
Në këto hapësira të fshatit Manastirc, ai dyshohet se u vra në mënyrë dinake.
Për këtë akt, Prokuroria Themelore në Ferizaj, ditë më parë ngriti aktakuzë për “vrasje të rëndë”, ndaj Leutrim Fejzës.
E të martën, në Gjykatën Themelore në Ferizaj, Fejza doli për herë të parë para Gjykatës.
Të shumtë në numër, ishin familjarët e Bekim Varit që erdhën ta përcillnin nga afër këtë shqyrtim fillestar.
Aty, prokurori i rastit, Shukri Jashari, shpjegoi se si kishte ardhur deri tek vrasja e Varit.
“I pandehuri me një person të paidentifikuar, me automjetin e tipit kamionetë, ngjyrë e bardhë, shkojnë e marrin të viktimën tek shtëpia e tij. Pastaj, me kamionetë shkojnë tek vendi i quajtur “Te Podi”, rrugën deri tek vila e vazhdojnë në këmbë, ku aty qëndrojnë deri të nesërmen pasdite, ku pastaj po në malet e fshatin Pleshinë e Ulët, shkojnë në këmbë për në shtëpi, ku për shkaqe të panjohura, devijojnë rrugën dhe shkojnë në rrugën që të shpie në fshatin Manastirc, po ashtu nëpër mal. Me të arritur në fshatin në fjalë, për motive të panjohura, i pandehuri e privon nga jeta tani të ndjerin, duke e qëlluar në kokë me armë që i ndjeri e kishte me vete”, ka thënë Jashari.
Sipas prokurorisë, krimi nuk kishte mbaruar me kaq.
“Pas privimit nga jeta, trupin e viktimës e mbulon me dhe, drunjë dhe dushkë. Pastaj, me qëllim që ta zhdukë në tërësi provat, me shkrepësen e tij të cilën e kishte me vete, ia vë flakën sendeve e që në vendin e ngjarjes janë gjetur mbetjet e disa sendeve që viktima i kishte me vete ditën kritike”, ka thënë tutje Jashari.
Prokuroria pretendon se i akuzuari kishte tentuar ta fshihte krimin e kryer, duke përdorur telefonin e të ndjerit për t’i dërguar mesazhe telefonike familjarëve të tij, në emër të viktimës.
“Me telefonin e viktimës, i dërgon sms djalit të vëllaut të të ndjerit, “Bir, jam nis për Gjermani me një shok, mos u bani marak. Babës kallxoju.” Kurse me datën 5 shkurt 2025, gjendet trupi i pajetë i të ndjerit nga disa qytetarë”, ka theksuar Jashari.
Për gjithë këto akuza, Fejza e mohoi fajin.
“Jo, nuk e pranoj fajësinë”, ka thënë Fejza.
Në këtë seancë të shqyrtimit fillestar, mbrojtja e Leutrim Fejzës kërkoi ndryshim të masës së sigurisë, por që u refuzua nga ana e Gjykatës.
Kundërshtimin e aktakuzës, palët kanë të drejtë që ta bëjnë në një afat brenda 30 ditësh.
