Kryetari i Partisë Demokratike të Kosovës, Memli Krasniqi ka votuar në shkollën fillore “Hasan Prishtina” në Prishtinë.
Krasniqi ka thënë se kjo ditë duhet të shfrytëzohet nga secili qytetar që ka të drejtë vote që sipas tij përmes saj ta japin verdiktin se nga dëshirojnë ta drejtojnë vendin në katër vitet e ardhshme.
Ai është shprehur optimist se edhe vota dhe verdikti qytetar do të jenë pozitive për PDK-në.
“Me besimin e plotë për të ardhmen e qytetarëve tanë, për mundësinë dhe potencialin për të pasur një jetë më të dinjitetshme për të gjithë, besoj që kjo ditë duhet të shfrytëzohet nga secili qytetar që ka të drejtë vote që të vij dhe përmes ushtrimit të kësaj të drejte ta japin verdiktin se nga dëshirojnë ta drejtojnë vendin në katër vitet e ardhshme. Jam besimplotë se ashtu siç kemi pasur një fushatë shumë pozitive, një fushatë që ka qenë e drejtuar kah e ardhmja, edhe vota dhe verdikti qytetar do ta thotë të njëjtën. Kështu që vërtetë shpresojë që ashtu siç e kemi bërë traditën e konsolidimit të këtij procesi të rëndësishëm demokratik, ta vazhdojmë edhe sot, sidomos tash që e kemi edhe Ligjin e ri zgjedhor”, ka thënë ai.
