Në qershor të këtij viti, deputetët e Kuvendit të Kosovës votuan ligjin e ri për zgjedhje të përgjithshme.
Në këtë formë është përcaktuar edhe votimi i bashkatdhetarëve nëpër përfaqësitë diplomatike dhe konsullore të Kosovës, në shtetet ku ata jetojnë.
Sipas ligjit, parashihet që votimi jashtë Kosovës të bëhet fizikisht në përfaqësitë diplomatike, të cilat shndërrohen në qendra të votimit apo duke dërguar fletëvotimet përmes kutive postare të KQZ-së në postën e Kosovës.
Këtë ndryshim e sheh pozitiv politologu Fidan Ukaj.
“Një lehtësirë e tillë është dashur të bëhej më herët për arsye se mërgimtarët kanë udhëtuar një pjesë e tyre prej vendit ku ata jetojnë dhe punojnë. Sigurisht se kanë pasë shpenzime të mëdha dhe tanimë atyre mundësia që të votojnë dhe të kenë shumë më pak shpenzime është ofruar aty ku ata jetojnë dhe një gjë e tillë është e mirëseardhur për mërgimtarët dhe një lehtësim shumë i madh”, tha Ukaj.
Megjithatë, mënyra e operimit sipas njohësit politik, Tomorr Avdia, është e paqartë.
“Ne se kemi të qartë ende se si do të operohet dhe se si do të parfumohet në këtë lloj mënyre për arsye se dihet që nëpër misionet diplomatike mungon ai rrjeti logjistik për ta bërë një punë të tillë dhe duhet një staf shumë më i madh”, tha Avdia.
Të komplikuar si proces e cilëson edhe këshilltari ligjor, Anton Ndrecaj.
“Mënyra e votimit të procesit zgjedhor me shku nje person qoftë në ambasada dhe konsullata është proces edhe më i komplikuar dhe në njëfarë forme mund të jetë edhe proces i dështuar sepse jo të gjithë mund të udhëtojnë”, tha Ndrecaj.
Sipas tij, institucionet shtetërore duhet të fillojnë iniciativën e ndryshim plotësimit të ligjit për zgjedhje për diasporën.
“Kosto më e ulët do të ishte mënyra e procesit të votimit online sepse njëherë e krijon atë softuer dhe ai mbetet nën menaxhimin e KQZ-së. Dmth është kosto më e ulët se sa po të angazhonin staf, njerëz të cilët janë të përgatitur për proceset e votimit, të dërgohen nëpër vende nëpër konsullata, ambasada gjithandej vendit”, shtoi ai.
Sipas ligjit të ri për zgjedhje parashihet që KQZ të mbulojë shpenzimet e këshillave të vendvotimit dhe ekipeve që angazhohen për të organizuar votimin në përfaqësi diplomatike dhe për grumbullimin e zarfeve në kutinë postare jashtë vendit, përfshirë edhe komisionerët e partive politike.
Tëvë1 ka kërkuar shpjegime nga KQZ në lidhje me mënyrën se si mund të realizohet procesi i votimit jashtë vendit dhe sa është numri i bashkatdhetarëve me të drejtë vote, por nuk ka marrë përgjigje nga ky institucion.
