Presidentja e Komisionit Evropian, Ursula von der Leyen, ka folur për situatën politike në Kosovë pas përfundimit të takimit me kryeministrin Albin Kurti.
Në konferencën për media, von der Leyen ka theksuar rëndësinë e stabilitetit institucional, duke përmendur formimin e Kuvendit dhe Qeverisë së Kosovës.
“Rëndësia e veçantë është stabiliteti institucional. Kuvendi dhe Qeveria janë themeluar, por hapi i radhës është zgjedhja e presidentit apo presidentes”, ka deklaruar von der Leyen.
Ajo ka vlerësuar gjithashtu se dialogu ndërmjet partive politike është i mundur dhe ka bërë thirrje që ky komunikim të vazhdojë.
“Vura re së fundmi se dialogu mes partive politike është i mundur dhe se ju duhet të vazhdoni në këtë drejtim. Stabiliteti institucional është themeli i gjithçkaje për reforma, për rritje dhe për përparimin në rrugëtimin tuaj drejt BE-së”, ka thënë ajo.
Von der Leyen ka folur edhe për perspektivën evropiane të Kosovës, duke thënë se beson në të ardhmen e vendit brenda Bashkimit Evropian.
“E ardhmja evropiane e Kosovës. E them pra, unë besoj në të ardhmen evropiane të Kosovës, edhe atë qartazi. E di se si ndjehet evropian populli i Kosovës dhe ky është një themel mbi të cilin duhet të ndërtojmë”, ka deklaruar presidentja e Komisionit Evropian.
Sipas saj, sfida kryesore është që aspirata evropiane e qytetarëve të Kosovës të shndërrohet në hapa konkretë drejt anëtarësimit në BE.
“Detyra jonë është ta shndërrojmë këtë aspiratë në progres konkret drejt anëtarësimit në BE. Kjo është saktësisht ajo që e bën të qartë Plani ynë i Rritjes”, ka thënë von der Leyen.
Ajo ka theksuar se parimet e Planit të Rritjes janë të njëjta për të gjithë rajonin e Ballkanit Perëndimor dhe se Bashkimi Evropian synon të mbështesë Kosovën përmes investimeve dhe reformave.
“Parimet janë të njëjta për gjithë rajonin. Ne vijmë me investime”, ka deklaruar von der Leyen.
