Presidentja e Komisionit Europian Ursula Von der Leyen, ka thënë se marrëveshja për armëpushim ndërmjet Izraelit dhe Iranit është hap i rëndësishëm për vendosjen e stabilitetit pas tensioneve në rajon.
Ajo në një postim në X i ka bërë thirrje Iranit për angazhim në bisedime.
“Evropa mirëpret njoftimin për një armëpushim nga Presidenti Trump. Është një hap i rëndësishëm drejt rivendosjes së stabilitetit në një rajon të tensionuar. Kjo duhet të jetë përparësia jonë e përbashkët. Ne i bëjmë thirrje Iranit të angazhohet seriozisht në një proces diplomatik të besueshëm. Sepse tryeza e negociatave mbetet e vetmja rrugë e qëndrueshme përpara”, ka shkruar ajo.
Presidenti amerikan ka njoftuar për një marrëveshje ndërmejt dy shteteve duke bërë të ditur se armëpushimi ka hyrë në fuqi.
Izraeli dhe Irani kanë thënë se do ta pranojnë marrëveshjen, por vetëm disa orë pas hyrjes në fuqi, Izraeli ka akuzuar Iranin për shkelje të armëpushimit.
