Në një konferencë për media, von der Leyen theksoi se Kosova e meriton liberalizimin e vizave, pasi të gjitha standardet janë përmbushur, përcjell teve1.info
“Ju kam dëgjuar mirë për aspektin e liberalizimit të vizave dhe e dini që keni një aleat dhe mua personalisht. Keni të drejtë, Kosova e meriton liberalizimin e vizave. I keni përmbushur të gjitha standardet. Dhe në fakt ishte vlerësim i joni tashmë, që kjo të bëhet në korrik të vitit 2018, tanimë e kemi rikonfirmuar qe e keni plotësuar të gjitha kriteret”, tha ajo.
Ajo shtoi se radha tani është për të bindur të gjithë anëtarët e Këshillit Evropian.
“Detyra jonë është tani që të bindim të tërë Këshillin Evropian, shumica e tyre janë tani në anën tuaj. Është shumë mirë që këto diskutime kanë rifilluar, kemi punuar me presidencën çeke mjaft shumë. Mirëpo mund të llogarisni në mua personalisht, mund të llogarisni tek ne në Komision, sepse ne do të bëjmë gjithçka për t’ju ndihmuar në rrugëtimin tuaj duke ditur që po bëni këtë punë mbresëlënëse. E keni bërë këtë punë mbresëlënëse, përkundër shumë vështirësive”, shtoi ajo.
Pjesë e kësaj konference është edhe presidentja e vendit, Vjosa Osmani. Pas këtij takimi, von der Leyen do të takohet edhe me kryeministrin, Albin Kurti. /Teve1.info/