Presidentja e Komisionit Evropian, Ursula von der Leyen u ka bërë thirrje Kosovës dhe Serbisë që t’i përmbahen udhërrëfyesit që palët kanë punuar në fillim të këtij viti.
Para mediave, von der Leyen theksoi se ky plan është shumë i qartë dhe është thelbësor për të ecur përpara, përcjell teve1.info
“Unë iu bëj thirrje të dyja palëve të de-përshkallëzojnë situatën dhe t’i përmbahen udhërrëfyesit. Kjo është absolutisht thelbësore për të ecur përpara në mënyrë paqësore,” deklaroi presidentja e KE-së.
Gjithashtu, ajo shtoi se Prishtina dhe Beogradi duhet të përmbushin atë që është rënë dakord në Ohër.
Qeveria e Kosovës ka konfirmuar dje se ka pasur një dakordim me emisarin e BE-së, Miroslav Lajçak “për krijimin e parakushteve pёr pёrforcim tё fokusit nё zbatimin e plotё dhe tё pakusht tё Marrёveshjes Bazike tё 27 shkurtit dhe aneksit tё Ohrit tё datёs 18 mars”.
Në këtë kontekst nga Qeveria kanë thënë se është rënë dakord që të tërhiqen menjëherë 25% e policëve që po qëndrojnë në dhe rreth objekteve komunale në pjesën veriore, e po ashtu mbështesin mbajtjen e zgjedhjeve të parakohshme në komunat veriore “të cilat do të mbahen pas verës”. /Teve1.info/
