Kancelari gjerman, Olaf Scholz dhe presidentja e Komisionit Evropian, Ursula Von Der Leyen, treguan haptazi se e mbështesin planin franko-gjerman.
“Është e saktë se konfliktet të cilat janë trashëguar në Ballkan duhet të zgjidhen. Tash kemi arritur disa hapa të rëndësishëm për Kosovën, Serbinë dhe Maqedoninë. Sa i përket Kosovës dhe Serbisë duhet të gjendet një mirëkuptim. Ne dhe qeveria franceze jemi duke u mundur ta bëjmë të realizueshme dhe shpresojmë që shumë shpejt të kemi një proces ku të dy qeveritë do të lëvizin përpara dhe të arrihet një marrëveshje. Kjo kërkon fuqi dhe durim të madh”, tha Scholz.
Mbështetje të fortë të këtij plani i dha edhe Presidentja e Komisionit Evropian.
“Nga Komisioni Evropian propozimi franko-gjerman ka përkrahje të plotë, integrimi i tij në dialog është i nevojshëm. U bëjmë thirrje të dyja palëve të ecin para në këtë, pasi është urë që po ndërtohet për të zgjidhur një problem që mund të zgjidhet”, tha Von der Leyen
Si mundësi të mirë këtë plan, e sheh edhe kryeministri Shqiptar Edi Rama.
“Plani franko-gjerman është mundësi e madhe jo vetëm për Serbinë e Kosovën, por edhe për rajonin e Evropën në tërësi. Shpresoj që të dyja palët ta marrin seriozisht e të dyja palët të kuptojnë se është koha që të shohin se është kontribut i rëndësishëm për të gjithë arkitekturën evropian të sigurisë”, u shpreh Rama
Në anën tjetër edhe kryeministri i Kosovës, Albin Kurti e ka konfirmuar se janë në rrugën e duhur për ta diskutuar kornizën e përgjithshme të marrëveshjes.
Kronika e gazetarit Shpat Blakçori.
