Raportuesja për Kosovën në Parlamentin Evropian, Viola von Cramon, sërish ka folur për dialogun ndërmjet Kosovës dhe Serbisë.
Ajo ka vlerësuar se Marrëveshja e Ohrit është një bazë e mirë që synon “t’i mundësojë Kosovës t’i bëjë hapat e ardhshëm dhe të materializojë qëndrimin e saj pro-evropian, reformat e saj, në procesin e anëtarësimit në Bashkimin Evropian dhe në procesin e anëtarësimit në Këshillin e Evropës”.
Mirëpo, siç thekson ajo, “sado e hidhur të jetë, duhet të plotësohet një kusht, e ai është propozimi për formimin e Asociacionit në një formë”.
“Nëse të dyja palët tregojnë një vullnet të caktuar politik për të arritur një kompromis, ne mund të bëjmë një hap të madh përpara”, thotë Von Cramon dhe në të njëjtën kohë vlerëson se “një pjesë e madhe e provokimeve vijnë nga Serbia, për këtë sigurisht që nuk ka dyshim – por ne gjithashtu duhet ta shohim që edhe Kosova kontribuon në këtë”, tha Cramon për “Deutsche Welle”.
