Incidenti i presidentes së Kosovës, Vjosa Osmani, në aeroportin e Shkupit ka marrë vëmendje të madhe në opinionin publik.
Presidenca e Kosovës ka akuzuar autoritetet e Maqedonisë së Veriut për shkelje të praktikave ndërkombëtare duke thënë se, gjatë 1 gushtit, presidentes Vjosa Osmani është tentuar t’i merret telefoni personal nga një pjesëtar i sigurimit të Aeroportit të Shkupit.
Mirëpo këto pretendime të zyrtarëve shtetëror të Kosovës i ka hedhur poshtë Agjencia e Aviacionit Civil të Maqedonisë së Veriut.
Gjithnjë sipas tyre shërbimet e aeroportit që janë përgjegjëse për kontrollet e sigurisë kanë vepruar në mënyrë profesionale dhe u janë përmbajtur rregullave që zbatohen ndërkombëtarisht.
“Nëse zyrtarët në TAV Maqedoni do të vepronin ndryshe nga rregullat e përcaktuara dhe do të lejonin lëshime dhe shmangie të procedurave të parapara, do të përballeshin me sanksione serioze nga Agjencia e Aviacionit Civil si organ përgjegjës për rregullimin e tyre”, thuhet në komunikatën e tyre.
Pas këtij raporti nga institucionet e Maqedonisë së Veriut, i menjëherëshëm ishte reagimi nga presidenca e Kosovës.
Sipas tyre në asnjë vend të botës kreut të shtetit nuk i kërkohet ta dorëzojë telefonin për skanim.
“Siç kemi deklaruar disa herë, presidentja e ka vendosur në kontroll çanten e saj dhe ajo e ka kaluar skanerin. Çdo deklaratë tjetër është propagandë për qëllime politike. Nuk ka asgjë profesionale në sjelljen e sigurimit që i del përpara kreut të një shteti dhe ia bllokon lëvizjen pasi ta ketë vendosur edhe çantën në skaner”, thuhet në komunikatën e Presidencës.
Hulumtuesi i politikës së jashtme, Emir Abrashi, thotë se kur udhëtohet me aeroplan komercial e jo privat atëherë rregullat vlejnë njësoj për të gjithë pasagjerët.
“Në rastin e fluturimeve me aeroplan komercial vlejnë rregullat e njëjta për të gjithë pasagjerët. Çfarë kam mundur të kuptoj nga deklarimet e Autoritetit të Aviacionit Civil të Maqedonisë bëhet fjalë për mos tolerim nga ana e kapitenit të avionit që asnjë pasagjer të mos lejohet të hyjë në bord pa i kaluar të gjitha kontrollet e sigurisë”, ka thënë Abrashi.
Tutje, Abrashi thotë se reagimi i presidentes Osmani dhe mos durimi i saj në këtë rast ngjall shumë dyshime të tjera.
“Në këtë rast reagimi i presidentes, Vjosa Osmani, dhe pamundësia që iu është bërë autoriteteve të sigurisë në raste të tilla ngjall dyshime të tjera. Ne akoma nuk e kemi të qartë se ku ka qenë duke udhëtuar presidentja, ka qenë vizitë zyrtare apo private dhe kjo normalisht që do ti qartësonte disa gjëra” , deklaroi Abrashi.
Kryeministri i Maqedonisë së Veriut, Hristijan Mickoski, ka shprehur keqardhje për incidentin në Aeroportin e Shkupit, ku u përfshi presidentja e Kosovës, Vjosa Osmani.