Ministri i Shëndetësisë, Arben Vitia, u ka bërë thirrje prindërve që të kontrollojnë statusin e vaksinimit të fëmijëve të tyre dhe të sigurohen se janë të vaksinuar kundër fruthit.
Përmes një videomesazhi të publikuar në Facebook, Vitia ka paralajmëruar për rikthimin e fruthit në vend, duke theksuar rëndësinë e vaksinimit për parandalimin e përhapjes së mëtejshme të kësaj sëmundjeje.
“Të dashur prindër, fruthi është rikthyer në vendin tonë, sëmundje që mund të shkaktojë komplikime dhe shumë telashe shëndetësore. Kjo situatë kërkon vëmendjen, përgjegjësinë dhe angazhimin e përbashkët të të gjithëve për të parandaluar përhapjen e mëtutjeshme të kësaj sëmundjeje, lehtë të parandalueshme me vaksinim të rregullt, siç e kemi bërë me gjenerata”, ka deklaruar Vitia.
Ai ka theksuar se institucionet shëndetësore po e monitorojnë nga afër situatën epidemiologjike dhe po ndërmarrin masat e nevojshme për mbrojtjen e shëndetit të qytetarëve, veçanërisht të fëmijëve.
Sipas ministrit, vaksinimi i rregullt mbetet mënyra më e sigurt dhe më efektive për mbrojtjen nga fruthi dhe parandalimin e përhapjes së tij.
“Vaksinimi është mënyra më e sigurt dhe më efektive për mbrojtjen nga fruthi. Prandaj, të dashur prindër, ju lutem që të kontrolloni statusin e vaksinimit të fëmijëve tanë dhe të sigurohemi që ata të jenë të vaksinuar”, ka apeluar Vitia.
Ndryshe, në përditësimin e fundit të bërë nga Instituti Kombëtar i Shëndetit Publik është thënë se nga 16 prilli deri më 11 tetor janë regjistruar 203 raste me fruth, ndërsa prej tyre 17 janë regjistruar gjatë javës së fundit./teve1.info/
