Ministri i Shëndetësisë, Arben Vitia është pritur në takim nga kryetari i Komunës së Drenasit, Ramiz Lladrovci, me të cilin kanë biseduar lidhur me projektet që do të rrisin gamën e shërbimeve për qytetarët e kësaj komune.
Në njoftimin e MSH-së, është bërë e ditur se temë kryesore mes Vitisë dhe Lladrovcit ishte ndërtimi i QKMF-së në Drenas.
“Ministri i Shëndetësisë, Dr. Arben Vitia ka vazhduar me vizitat në funksion të rritjes së kapaciteteve shëndetësore, me theks të veçantë realizimit të investimeve kapitale të cilat do të realizohen nga Ministria e Shëndetësisë. Sot, Ministri Vitia u prit në takim nga kryetari i Komunës së Drenasit, Ramiz Lladrovci me të cilin bashkëbiseduan lidhur me projektet të cilat do të ngrisin cilësinë dhe gamën e shërbimeve për qytetarët e Komunës së Drenasit. Temë kryesore e bisedës ishte ndërtimi i QKMF-së, por edhe mundësitë tjera që qytetarëve t’u ofrohet infrastrukturë cilësore në nivelin primar të shëndetësisë”, thuhet në njoftim.
Sipas MSH-së, Lladrovci e ka njoftuar Vitinë se këtë vit është dyfishuar buxheti komunal në sektorin e shëndetësisë.
“Kryetari i Komunës së Drenasit, Ramiz Lladrovci e njoftoi ministrin Vitia se sivjet është dyfishuar buxheti komunal në sektorin e shëndetësisë, si dhe e informoi se në këtë komunë shërbimet shëndetësore ofrohen nga 40 mjekë dhe 94 infermierë në QMF-të e Drenasit. Që të dy u dakorduan për një bashkëpunim më efektiv sa i përket aspektit infrastrukturor apo edhe të furnizimit me pajisje shëndetësore që do të jenë në shërbim të qytetarëve”, thuhet më tej në njoftim. /Teve1.info/