Ministri i Shëndetësisë, Arben Vitia, gjatë raportimit në Komisionin për Shëndetësi dhe Mirëqenie Sociale, ka premtuar ndryshime në sektorin e shëndetësisë, të cila siç tha ai, do ta reformojnë në thelb sistemin shëndetësor në vend.
“Gjatë këtij viti do të miratohet Ligji për Shëndetësisë bashku me atë për sigurime shëndetësore dhe këto dy ligje do të jenë thelbi i reformës në sektorin e shëndetësisë. Reformimi dhe përforcimi i inspektoratit shëndetësor, reformimi i SHSKUK-së, përforcimi i agjencisë për barna përfshirë Ligjin për rregullimin e barnave. Këto masa presim ta japin rezultatin e tyre këtë vit në gjashtë mujorin e parë. Ka një kulturë pune të munguar në planifikim”, ka thënë ai.
Ministri Vitia tha se si prioritet i tij gjatë këtij mandati do të jetë funksionalizimi i objektit të Emergjencës dhe sigurimin e barnave esenciale dhe uljen e listës së pritjes.
“Urgjencat prioritare janë sigurimi i profesionistëve mjekësor në fushat deficitare, zvogëlimi i listës së pritjes në nivelin terciar, ndërhyrjet infrastrukturore spitalore, vendosja e standardeve për pranimin e pacientëve. Kontrolli i barnave, përfshirë edhe kontrollin e tregut, mbikëqyrja e institucioneve private dhe të sigurisë, reformimi i referimit të pacientëve jashtë shtetit, hapja e konkurseve me standarde të reja e kështu më radhë. Me qëllim funksionalizimit të ndërtesës së Emergjencës është bërë buxhetimi i mjeteve shtesë, me qëllim përfundimin sa më të shpejtë. Kemi filluar përgatitjet për sigurimin e ndërtesës së depos së barnave, pasi kjo aktualja lë shumë për të dëshiruar”. tha ai.
