As ky shtator nuk do të fillojë pa telashe në shkollat e Kosovës.
Për dallim nga viti i kaluar, greva nuk do të ketë dhe punonjësit e arsimit janë bërë gati për vitin e ri shkollor.
Por ndryshimi i furnizimit me libra ka shkaktuar konfuzione në sektorin e arsimit.
Kryetari i SBASHK-ut, Rrahaman Jashari, ka deklaruar se blerja e librave nga prindërit do të krijojë një mori të problemeve në shkollat në Kosovë.
Madje shuma prej 80 euro për të blerë tekstet dhe materialet mësimore sipas Jasharit është e vogël.
Por njëjtë nuk mendojnë nga Këshilli i Prindërve të Kosovës.
Sipas sekretarit të këshillit të Prindërve, Enver Balaj mjetet që do të jap MASHT-i do të jenë të mjaftueshme për blerjen e librave shkollor derisa presin që deri në fund të javës të marrin paratë.
MASHTI këtë vit shkollor do të subvencionojë tekstet e reja për nxënësit e klasave 1-5, ndërsa për nxënësit e klasave 6-9 do të jenë në dispozicion tekstet e vitit paraprak.
Ndërkohë gjatë ditës Sindikata e Bashkuar e Arsimit, Shkencës dhe Kulturës e Kosovës ka mbajtur një mbledhje me ç’rast ka vlerësuar se viti shkollor do të fillojë me problemet të cilat i krijojë MASHTI me eksperimentin e gabuar për tekstet shkollore.
