Numri i emigrantëve të parregullt që hynë në vendet e Ballkanit me synim për të kaluar drejt vendeve evropiane gjatë vitit 2024 ishte 78% më pak se viti 2023, sipas të dhënave vjetore të publikuara nga Agjencia Evropiane e Ruajtjes së Kufijve, FRONTEX.
Rreth 21 mijë emigrantë të parregullt kryesisht nga Siria, Turqia dhe Afganistani u ndaluan nga policitë kufitare në të ashtuquajturën “Rruga ballkanike” e kalimit të emigrantëve që përfshin vendet e Ballkanit Perëndimor, mes të cilave dhe Shqipëria.
Sipas FRONTEX-it në total kalimet e emigrantëve të parregullt drejt vendeve të Bashkimit Evropian ishin rreth 239000 gjatë vitit 2024.
FRONTEX-i vëren se rënia e përgjithshme e numrit të emigrantëve të parregullt është duke arritur nivelin më të ulët që nga viti 2021, kur migrimi ishte ende i prekur nga pandemia COVID.
Sipas FRONTEX-it krahas rënies më të madhe të shënuar në Ballkan rënia e numrit të përgjithshëm u shkaktua kryesisht nga një rënie prej 59% e mbërritjeve përmes rrugës së Mesdheut Qendror, për shkak të më pak nisjeve nga Tunizia dhe Libia. /VoA/
