Po renditen disa produkte të qumështit.
Këto janë disa nga të cilat deri më tani është konstatuar se kanë përmbajtje të padeklaruar.
Janë këto të dhënat që prezantoi këtë të hënë Ministria e Bujqësisë.
Ministri në detyrë, Armend Muja deklaroi se qumështorja “Vita” ka importuar më së shumti sasi të vajit të palmës dhe të qumështit pluhur.
Megjithatë ministri tha se një mostër është gjetur që nuk ka problem.
“Është konstatuar përtej dyshimit që Qumështorja ‘Vita’ ka importuar sasi të mëdha të vajit të palmës, për ta arritur kulmin në vitin 2025 që është afërsisht 1 milion kg…po, është gjetur që një mostër që nuk ka problem, por jo për qumështin pluhur”, u shpreh Muja.
Ai u ndal te mostrat e një lloj qumështi, duke thënë se sipas analizave laboratorike të Agjencisë së Ushqimit dhe Veterinarisë, në katër mostra të ndryshme është konstatuar prani e vajit të palmës.
“E para është mostra me numër serik 2930. Konstatohet prania e vajit të palmës, pa u deklaruar. Dhe pyetja është: cili është ai qumësht? Më në fund jemi të informuar se bëhet fjalë për qumështin “My Coë” 3.2. Ata që thonin barista – nuk është barista, është qumësht me lopë. Ky është qumështit “My Coë” 3.2% qumësht”, sqaroi ai.
Një reagim të hënën pati nga Qumështorja “Vita”, të cilët akuzuan ministrin në detyrë të Bujqësisë, Armend Muja, duke thënë se u përpoq ta njollosë “Vitën”.
“Sot, vetë Ministri konfirmoi se në analizat e qumështit VITA nuk është gjetur vaj palme. Pikërisht këtë kemi kërkuar që nga dita e parë: publikoni analizat dhe lërini qytetarët ta shohin të vërtetën”, thuhet në reagim.
Sipas “Vitës”, publikimi i analizave ka qenë kërkesë e saj që nga fillimi i kësaj çështjeje.
