Pesë persona u vranë dhe qindra të tjerë u plagosën gjatë festimeve të Vitit të Ri në Gjermani pasi u goditën aksidentalisht nga fishekzjarrët, raportoi agjencia gjermane e lajmeve DPA.
Në Berlin, 30 oficerë policie dhe një zjarrfikës u plagosën në konfrontime ose sulme gjatë natës së Vitit të Ri, duke çuar në 400 arrestime, thanë zyrtarët e qytetit.
Qindra oficerë policie nga e gjithë vendi u vendosën në kryeqytet për të ndihmuar në parandalimin e dhunës së mëtejshme.
Shpërthimet e fishekzjarrëve shumë të fortë dhe të paligjshëm në Berlin shkaktuan gjithashtu dëme të mëdha në dy lagje të Berlinit dhe plagosën shumë njerëz, disa prej tyre rëndë.
Sipas departamentit të zjarrfikësve të qytetit, shpërthimet e fuqishme dëmtuan rëndë fasadat e shumë shtëpive dhe thyen shumë dritare.
Tridhjetë e gjashtë apartamente janë aktualisht të pabanueshme, raportoi DPA, citon AP.
Një spital në lagjen Marzahn të Berlinit tha se trajtoi 25 pacientë, përfshirë fëmijë, “me lëndime të rënda në duar, duke përfshirë amputime të pjesshme ose të plota të këmbëve”.
Policia dhe ekipet e ndihmës së shpejtë u sulmuan me fishekzjarre në disa qytete, duke përfshirë Berlinin, Hamburgun, Frankfurtin, Leipzigun dhe Mynihun.
Në Leipzig, policia u sulmua me fishekzjarre dhe shishe, u ngritën barrikada dhe u vu flaka kazanëve të mbeturinave.
Ministrja e Brendshme gjermane, Nancy Faeser u uroi të gjithë oficerëve të plagosur shërim të shpejtë dhe u zotua se të gjithë autorët e krimit do të “ndiqen penalisht dhe ndëshkohen me ashpërsinë më të madhe”.
