Të paktën 65 palestinezë janë vrarë në sulmet e vazhdueshme izraelite në Gaza që nga agimi i ditës së sotme, njoftuan burime spitalore për Al Jazeera.
Mes të vrarëve janë edhe 16 persona që po kërkonin ndihmë, sipas burimeve.
Forcat izraelite kanë intensifikuar pushtimin tokësor në Khan Younis, në jug të Gazës, nën komandën e Divizionit të 36-të. Brigada e Parashutistëve po vazhdon zgjerimin e ofensivës në këtë zonë, raporton Al Jazeera.
Në raportin e ushtrisë izraelite thuhet se “dhjetëra terroristë” janë vrarë në luftime të afërta, ndërsa shumë ndërtesa, përfshirë blloqe banimi, janë shkatërruar. Ushtria publikoi gjithashtu pamje nga dy shpërthime të mëdha dhe nga avancimi i trupave të saj mes rrënojave të Khan Younis.
Ministria e Shëndetësisë në Gaza bëri me dije se në 24 orët e fundit në spitalet e rajonit janë sjellë të paktën 116 trupa të pajetë dhe 463 të plagosur si pasojë e sulmeve.
Që nga shkelja e armëpushimit mes Izraelit dhe Hamasit më 18 mars, mbi 6,315 palestinezë janë vrarë dhe më shumë se 22,064 janë plagosur gjatë përleshjeve të vazhdueshme në rajon.
Prej fillimit të luftës në tetor 2023, numri i të vrarëve në Gaza ka arritur të paktën në 56,647, ndërsa 134,105 persona janë plagosur si rezultat i sulmeve izraelite.
