Kryetari i Prishtinës, Përparim Rama bashkë me drejtoreshën e Arsimit në këtë komunë, Jehona Lushaku-Sadriu kanë vënë gurthemelin e objektit të shkollës fillore të mesme të ulët në lagjen “Mati 1”. Kjo shkollë parashihet që të ketë kapacitet për pranimin e mbi 700 nxënësve me një hapësirë prej 4 mijë e 800 metra katror, e cila pritet të funksionalizohet në korrik të vitit 2025.
Rama potencoi se kostoja e ndërtimit të tri shkollave, përfshirë atë në “Sofali” që do të fillojë javën e ardhshme dhe ajo në lagjen “Qëndresa” është mbi 15 milionë euro. Derisa tregoi se është investim i sektorit privat e që më pas komuna do të kthejë mjetet brenda disa viteve.
“4 mijë e 800 metra kator është e madhe shkolla. Investimi, ne veçse e kemi nënshkruar kontratën për një vit e gjysmë, është partneritet publiko-privat, i gjithë investimi është prej sektorit privat, ndërsa në momentin kur edhe shkolla përfundon, bëhet, funksionalizohet fillojmë të paguajmë mirëmbajtjen”, tha Rama.
Ndërkaq, drejtoresha e Arsimit në komunën e Prishtinës, Jehona Lushaku-Sadriu tha se kjo shkollë i përmbushë të gjitha standardet evropiane për nga ndërtimi dhe dizajni për mësim tërëditor.
“Kjo shkollë i përmbush të gjitha standardet evropiane dhe për nga ndërtimi, dizajni për mësim tërëditor. Të jetë një shkollë për klasat e para deri në të pestat. Për shkak se do t’i shkarkojë shkollat e kryeqytetit ‘Ismail Qemali’ dhe ‘Pavarësia’, në ndërkohë që do ta kemi edhe një shkollë në Mat që do të mund ishte gjashtë deri nëntë dhe si lagje do të kompletohej me shkollë fillore dje të mesme të ulët”, potencoi Lushaku-Sadriu.
Përveç kësaj, Lushaku e quajti të paaftë ministrinë e Arsimit për mosfurnizimin e nxënësve me libra shkollor. Ajo tha se në librari nuk ka libra të botuara për nxënësit, sepse nuk kanë qenë të informuara me kohë.
