Janë vënë gurthemelet e një xhamie në komunën e Gjilanit. Rëndësia e këtij institucioni fetar, u theksua nga përfaqësues lokal e qendror të Bashkësisë Islame.
Për vënien e themelit të xhamisë u tubuan prijës të institucioneve fetare lokale e qendrore, akterë politikë e qytetarë.
Kryemyftiu tregoi për rëndësinë që ka ndërtimi i një xhamie.
“Ata që janë bërë sebep për ndërtimin e kësaj xhamie, po ua them një hadith të pejgamberit Muhamedi a.s, “Ai i cili e ndërton një xhami, Allahu xh. ka për t’i ndërtuar një shtëpi në ditën e gjykimit, në ditën e kiametit”, tha kryemyftiu i Kosovës, Naim Tërnava.
E myftiu i Gjilanit, potencoi aktivitet që do të zhvillohen në xhaminë e re.
“Xhamia jonë, për të cilën sot po vendosim gurthemelet, do të jetë një hapësirë e mbështetjes dhe e dijes. Këtu do të zhvillohen aktivitete që do t’i përkrahin të rinjët dhe dhe do t’u japin shpresë të moshuarve. Kjo do të jetë një strehë ku do të takohen dijetarë, nxënës e besimtarë”, tha myfiu i Gjilanit, Naim Aliu.
Për rëndësinë e edukimit fetar tek të rinjët, foli i pari i komunës së Gjilanit.
“Në ditët e tilla, kur institucionet fetare rriten atëherë edhe dukuritë negative në shoqëri do të duhej të binin më poshtë. Është brengë e jona e përditshme që të rinjtë tanë e qytetarët tanë, të jenë të edukuar mirë, të jenë të mësuar mirë ashtu siç duhet, ndërkohë të punojnë e të angazhohen për qytetin e tyre dhe komunitetin e tyre për shoqërinë përgjithësisht”, tha kryetari Alban Hyseni.
Për ndërtimin e kësaj xhamie, kanë kontribuar edhe qytetarë dhe mërgimtarë të komunës së Gjilanit.
