Ashtu si çdo vit, edhe këtë 28 qershor, qytetarët e komunitetit serb shënojnë festën religjioze të “Vidovdanit”.
Ndryshe nga viti paraprak, këtë vit institucionet e sigurisë të Kosovës kanë marrë vendim të ndalojnë hyrjen e personave që vijnë nga Serbia.
E kjo ditë po konsiderohet se mund të përcillet edhe me tensione.
Njohësi i sigurisë, Drizan Shala thotë se e gjithë kjo mund të ndodh për motive politike.
“Narrativa që është krijuar këtyre ditëve të fundit nga ana e Beogradit zyrtar, padyshim që sipas analizave dhe informacioneve preliminare mund të presim tensione të cilat janë tensione me motive politike, me motive të direktivës zyrtare të Beogradit, përmes strukturave të saja paralele dhe, njëkohësisht duke e mbështetur nga elementi hibrid, pra në aspektin taktiko operacional Policia e Kosovës, sipas gjitha gjasave ka marrë gjitha masat e duhura preventive. Normalisht edhe inteligjenca do duhej të ishte pjesë përbërëse e këtij manifestimi për të observuar lëvizjet e mundshme të strukturave paralele, nëse marrin pjesë struktura të inteligjencës së Serbisë”, tha Shala.
I të njëjtit mendim është edhe profesori i Kriminalistikës, Fatmir Çollaku.
Ai e vlerëson vendim të duhur ndalimin e serbëve, për të parandaluar, siç thotë ai, ndonjë përshkallëzim të situatës.
“Sivjet ardhja e tyre është ndaluar, konsideroj se është një masë preventive e mirë nuk bëhet fjalë për kufizim të lirive të drejtave të njeriut apo dicka të ngjashme, por është një masë e karakterit preventiv për të parandaluar ndonjë ekses të ndonjë përshkallëzim të situatës duke ditur faktin që rrethanat, dinamikat e zhvillimeve në Lindjen e Mesme por edhe në Evropë është e tillë, janë të karakterit të tensionimit ndëretnik, ndërshtetërorë”, deklaroi Çollaku.
Sipas tij, kjo u bë me vendim të Gjykatës.
“Që të mos ndodhë një ngjarje e padëshiruar dhe e dëmshme për interesin nacional të Republikës së Kosovës dhe më gjerë, me vendim Gjykate është ndaluar ardhja e tyre në kuptim, të përdorimin të rekuizitave, shenjave që janë të karakterit nacionalist, të cilat mund të perceptohen mjete përmes së cilave, është nxitja e urrejtjes që është vepër penale sipas kodit penal të Republikës së Kosovës”, tha ai.
Në festimin e “Vidovdanit” vitin e kaluar, një person ishte shoqëruar në stacionin e Policisë.
Festimi i kësaj dite lidhet me 636-vjetorin e Betejës së Kosovës, të cilën historia serbe e njeh si fitore, me gjithë humbjen e madhe të forcave ballkanike dhe vrasjen e princit serb, Llazarit.
