Janë ndër të akuzuarit kryesor për sulmin terrorist në kanalin e Ibër-Lepencit.
Bëhet fjalë për dy vëllezërit Viçentijeviq, ndaj të cilëve Prokuroria Speciale e Republikës së Kosovës, ngriti edhe aktakuzë të martën.
Por, mbi Jovan Viçentijeviq, nuk po rendojnë vetëm akuzat për këtë sulm terrorist.
Në aktakuzë, thuhet se ky i fundit, propagandoi për ngritjen e një organizate fiktive.
Madje për të, zgjodhën emrin “Komiteti Kombëtar për Lirimin dhe Mbrojtjen e Trojeve Shqiptare”
“Në kuadër të dokumentacioneve, që i pandehuri ka siguruar gjatë veprimtarisë së tij inkriminuese, janë dhe një dokument i klasifikuar si konfidencial prej 66 faqesh, për nevojat e operacioneve në teren, pastaj ka bërë vëzhgimin e lëvizjeve të ushtarëve amerikanë të KFOR-it, ka fotografuar bazën e Njësive Speciale të Policisë në Jasenovik, që gjendet në komunën e Zubin Potokut, e në veçanti i pandehuri me qëllim të krijimit të një narrative të dëmshme për Kosovën, në raport me bashkësinë ndërkombëtare, i njëjti përmes një dokumenti të modifikuar ka tentuar ta paraqes ekzistimin e një organizatë fiktive kinse për çlirimin e trojeve shqiptare e quajtur si “Komiteti Kombëtar për Lirimin dhe Mbrojtjen e Trojeve Shqiptare”, duke e shoqëruar me disa fotografive të eprorëve të lartë të UÇK-së, me çka këto veprime seriozisht ka dëmtuar rendin juridik dhe sigurinë e Republikës së Kosovës, si dhe ka rrezikuar jetën e zyrtarëve të saj”, thuhet në aktakzuë.
Por, çfarë dyshohet se synonin të arrinte Jovan Viçintijeviq përmes kësaj organizate?
“Prapa saj ata mundohen të formojnë organizata apo mekanizma të ndryshëm, e pastaj të kryejnë veprime kriminale siç është rasti i Ibër-Lepencit apo edhe raste të tjera Hibride në Mitrovicën Veriore”, thotë ish-koloneli Refki Morina.
E avokatët, tregojnë se sa e parasheh ligji dënimin për veprat e tilla.
“Kategoria e veprave penale më të cilat ngarkohen të pandehurit, është relativisht e rëndë, ku shkalla e ndeshkueshmerisë për këto vepra është me burgim deri në 25 vite”, tha Ardian Bajraktari.
Në hetimet për këtë ngjarje, përveç organeve vendore të sigurisë, u përfshi edhe FBI amerikane.
