Në mbrëmjen e sotme, njësia policore në një pikë kontrolli në fshatin Banje në një rrugë ilegale në veri, duke realizuar detyrat në atë vend ka qarkulluar një automjet, ku zyrtarët policorë i kanë dhënë urdhrin që të ndalet, por i njëjti ka rritur shpejtësinë dhe ka ikur përmes rrugëve ilegale.
Nga shpejtësia e madhe e veturës, i dyshuari i ka rrezikuar jetën e zyrtarëve policorë, përderisa njëri prej tyre me qëllim të shmangies së rrezikut për jetën e tij dhe të tjerëve është detyruar të përdorur armën e zjarrit, raporton teve1.info
“Zyrtarët policor në pikë kontrolli sipas procedurave kanë sinjalizuar automjetin me bateri që të ndaloj për kontroll rutinor, por personi i dyshuar (drejtuesi i automjetit) posa ka vërejtur zyrtarët policor të cilët e kanë sinjalizuar për ndalim, ka rritur shpejtësinë për të ikur nga ndalimi duke rrezikuar drejtpërdrejt jetën e zyrtarëve policor, përderisa njëri nga zyrtarët policor me qëllim të shmangies së rrezikut të drejtpërdrejt për jetën e tij dhe zyrtarëve tjerë policor është detyruar që të përdor armën e zjarrit”, thuhet në njoftimin e Policisë.
Policia ka thënë se janë duke hetuar rastin për identifikimin dhe arrestimin e personit/ve të dyshuar të përshirë në këtë ngjarje.
“Si vazhdimësi e hetimit gjatë realizimit të detyrave policore, njësitë relevante policore kanë ndaluar dy automjete tjera të cilat kanë ardhë në atë lokacion, e që dyshohet se mund të ndërlidhen me veturën e dyshuar, në te cilat vetura gjendeshin pesë persona, të cilët janë dërguar në stacion policor për intervistim dhe procedura të mëtejme në bashkëpunim dhe koordinim me organet e drejtësisë”, thuhet në njoftim.
