Janë bërë 17 vite që kur Kosova ratifikoi Kushtetutën e saj.
E po në këtë përvjetor, po vlerësohet se ky akt që garanton të drejtat dhe liritë themelore të të gjithë qytetarëve, është cenuar përgjatë viteve.
Shkeljet më të mëdha, sipas Institutit të Kosovës për Drejtësi, u bënë në legjislaturën e fundit në të cilën udhëhoqi Lëvizja Vetëvendosje.
“Ka ose shënon një rekord të numrit të shkeljeve Kushtetuese në lidhje me miratimin e ligjeve e gjithashtu edhe vendimeve të tjera të cilat veçse i kanë nxjerrë dhe Gjykata Kushtetuese i ka nxjerrë që janë në kundërshtim me Kushtetutën.01:37 Përshembull e kemi rastin e ligjit për Këshillin Prokurorial ku Gjykata Kushtetuese e ka konstatuar që është në kundërshtim me Kushtetën e Republikës së Kosovës, gjithashtu e kemi rastin për ligjin e pagave në sektorin publik”, ka deklaruar Melos Koloshi nga IKD.
E sipas profesorit të çështjeve juridike, Mazllum Baraliu, aktorët politik duhet ta respektojnë çdo nen dhe ligj të Kushtetutës.
“Është një ditë e rëndësishme me peshë të jashtëzakonshme, dhe është një dokument, përvjetori po flas, është një dokument ku Kushtetuta që do duhej me respektin më të madh dhe të vazhdueshëm të sillemi ndaj saj të gjithë personat fizik qytetarë të republikës, ndaj institucionit të këtij vendi”, tha ai.
Baraliu tregoi edhe për vendimet që janë shkelur përgjatë viteve.
“Shembull konkret është vendimi i kësaj Gjykate lidhur me faljen e 24 hektarëve tokë Manastirit të Deçanit që asnjëherë nga opinioni publik nuk është miratuar”, tha ai.
Në këtë 17-vjetor, e para e shtetit, Vjosa Osmani tha se Kushtetuta është kontratë e përbashkët për një shoqëri demokratike, të drejtë e të barabartë.
“Në këtë ditë, riafirmojmë përkushtimin tonë për ta mbrojtur Kushtetutën, për ta zbatuar me përpikëri, dhe për ta jetësuar në çdo vendim, politikë e veprim. Sepse vetëm përmes forcimit të sundimit të ligjit dhe respektimit të rendit kushtetues, mund të ndërtojmë një shtet që i shërben qytetarëve të vet me dinjitet dhe drejtësi”.
Kushtetuta e Kosovës u miratua më 9 prill të vitit 2008, dhe kishte hyrë në fuqi më 15 qershor të po atij viti.
