Përmes një komunikate për media nga Dega e Lëvizjes së Vetëvendosje në Vushtrri bëhet e ditur se Kallëzimi Penal ndaj Idrizit është bërë për shkak të anulimit të konkursit për drejtor të shkollave.
“Të dashur qytetarë të Komunës së Vushtrrisë sot më 18.07.2022, Grupi i Asamblistëve tanë në Kuvendin Komunal ka ushtruar Kallëzim Penal për Keqpërdorim të pozitës apo autoritetit zyrtar ndaj kryetarit të komunës z. Ferit Idrizi në lidhje me anulimin e konkursit për drejtor të shkollave”, thuhet në njoftimin e VV-së në Vushtrri.
Përndryshe këtë lajm për Tëvë1 e ka konfirmuar edhe Asamblisti i VV-së në Kuvendin Komunal në Vushtrri, Refik Maloku.
Ai ka pohuar se Lëvizja Vetëvendosje në Vushtrri ka tentuar tri herë që në seancat e Kuvendit Komunal të diskutohet dhe të sqarohet anulimi i konkursit për drejtor shkollash, mirëpo sipas tij, kryetari Idrizi ka refuzuar në të tri rastet.
Maloku deklaron se Dega e Lëvizjes së Vetëvendosje në Vushtrri pretendon se Kryetari i Vushtrrisë e ka shkelur nenin 9, pika 1 dhe nenin 14, pika 4.
“Nuk deshi debat, vazhdojmë në gjykatë…Tri herë tentuam që të diskutohet dhe të sqarohet anulimi i konkursit për drejtorë shkollash, të tirja herët kryetari Ferit Idrizi refuzoi. Ne pretendojmë se Kryetari ka shkel nenin 9, pika 1 dhe nenin 14, pika 4.I mbetet gjykatës që të jep verdiktin përfundimtar”, ka thënë asamblisti i VV-së./Teve1.info/
