Kusari-Lila u ka bërë thirrje deputetëve të partive të tjera që ta mbështesin ligjin për martesat me gjini të njëjtë, shkruan Tëvë1.info
“Projekt-Kodi Civil është hera e parë që prezantohet në Kuvendin e Kosovës, përmban 1630 nene dhe pesë libra, është baza e të drejtës civile për secilin shtet në këtë rast edhe Kosovës. Ajo të cilës ju i referoheni, përbëhet në librin e katërt që është familja. Debate publik po vërehet që i gjithë debate po shkon në çështjen e librit të katërt e po humb fokusi te librat e tjera”, u deklarua ajo.
Sipas saj ky projekt-kod është shumë i rëndësishëm dhe duhet të mbështetet nga të gjithë deputetë e Kuvendit të Kosovës.
“Grupi Parlamentar i Vetëvendosjes do ta ketë në diskutim, natyrisht secili grup ka zëra të ndryshëm përbrenda për një referencë dhe ajo ka të bëj me rregullimin e martesës së gjinisë së njëjtë me ligj tjetër të veçantë, që nuk duhet t’i ndalojë edhe ata që kanë pikëpamje konservative të votojnë këtë projekt-kod, për arsye të peshës e rëndësisë dhe gjitha të tjerat. Kjo tregon se në shoqërinë tonë do të vazhdohet ky debat, është debat përmbajtësor dhe tepër i rëndësishëm në raport me të drejtat bazike elementare njerëzore por edhe për diskursin që shoqëria jonë si shoqëri evropiane e synon. Besojmë që ky projekt-kod është tepër i rëndësishëm dhe duhet të mbështetet nga të gjitha deputetët pa dallim”, tha Kusari.
Pas mbledhjes së kryesisë në lidhje me këtë rast është deklaruar edhe shefi i Grupit Parlamentar të AAK-së, Besnik Tahiri.
Ai ka thënë se është befasuar kur ka parë agjendën e Kuvendit, për arsye se në mbledhjen e Komisinoit kanë kërkuar sqarime nga Ministria e Drejtësisë.
Ai tutje ka thënë se Kodi Civil është jashtëzakonisht i rëndësishëm.
“U befasova kur e pashë në agjendën e Kuvendit, për shkak se në mbledhjen kur është votu Kodi, në mbledhjen e Komisionit kemi diskutu me e ftu ministren e Drejtësisë, për të marrë disa sqarime. Janë një varg nenesh që kishim dashtë sqarime shtesë nga Ministria. Nuk e kemi diskutu sepse nuk kam pritë që vjen në seancë, besoj se do t’ketë reagim edhe nga kolegët tjerë. Kodi Civil është jashtëzakonisht i rëndësishëm, do të duhet ta lexojmë e ta trajtojmë. Do të kemi një qëndrim të saktë, në parim si grup parlamentar mbështesim me e pasë një Kod Civil, por duhet ta trajtojmë”, ka thënë ai.
