Kryetari i shoqatës së Familjarëve së Dëshmorëve, Xhavit Jashari, ka trhënë për KosovaPress se protesta do të jetë forma e parë përmes së cilës do të kundërshtojnë miratimin në lexim të dytë të këtij projektligji derisa ka shtuar se nuk do të mbajnë përgjegjësi nëse protesta do të dalë jashtë kontrollit.
Ai ka thënë se përgjegjësia bartet te Qeveria pasi sipas tij, veteranët po i kërkojnë të drejtat e tyre.
“Ne do të protestojmë, ne do të kundërshtojmë, do të konsultohemi edhe me organet tona drejtuese, Organizata e Veteranëve dhe shoqatat, në këtë rast Invalidëve dhe Familjeve të Dëshmoreve, dhe forma e parë do të jetë protesta dhe nuk garantojmë nëse eskalon situata sepse është qeveria dhe kryeministri në këtë vend që po e bën një veprim për të ardhur deri këtu dhe mendoj që përgjegjësitë bien mbi atë që shkakton problemet dhe jo ata që kërkojnë të drejtat e tyre”, ka deklaruar Jashari.
Ndërkohë, qëndrimi i Qeverisë së Kosovës është se paga minimale dhe beneficioni i veteranëve janë çështje të ndara ndërsa insiston në një ligj të ri me lista të pastruara dhe më pas edhe mundësi që kjo kategori të trajtohet.
Veteranët kanë protestuar dy herë para qeverisë dhe Kuvendit të Kosovës për të kërkuar përfshirjen e tyre në projektligjin për ndryshimin dhe plotësimin e ligjeve që përcaktojnë pagën minimale.
