Autoritetet lokale në Gaza kanë njoftuar të dielën se vetëm 73 kamionë me ndihma kanë hyrë në enklavën e rrethuar në 24 orët e fundit, derisa uria e shkaktuar nga bllokada disamujore e Izraelit vazhdon të përkeqësohet.
Në një deklaratë, zyra qeveritare për media tha se kriza humanitare ka arritur nivele të papara, me të paktën 133 persona, përfshirë 87 fëmijë, që kanë vdekur nga uria që nga fillimi i luftës gjenocidale izraelite.
Zyra akuzoi Izraelin për shkaktimin e qëllimshëm të kaosit dhe urisë në territor.
“Uria po përhapet me një shpejtësi alarmante dhe tani prek të gjithë popullsinë e Gazës, përfshirë 1.1 milion fëmijë”, thuhet në deklaratë.
Ndërsa disa qeveri dhe organizata ndërkombëtare kanë njoftuar plane për të dërguar qindra kamionë me ndihma në Gaza, deklarata tha se vetëm 73 kamionë kanë mbërritur dhe shumë prej tyre janë plaçkitur ose penguar nën mbikëqyrjen izraelite.
Zyra e medias tha se u kryen tre dërgesa ndihmash nga ajri mbi Gaza, por ngarkesa e tyre totale ishte ekuivalente me vetëm dy kamionë me ndihma, transmeton Anadolu.
Plumbat ranë në “zonat e kuqe” – zona aktive të luftimeve të shënuara në hartat izraelite – ku civilët nuk mund të marrin furnizime në mënyrë të sigurt, shtoi ajo.
“Ajo që po ndodh është një farsë”, tha zyra, duke akuzuar bashkësinë ndërkombëtare për bashkëpunim përmes “premtimeve të rreme” dhe “informacioneve mashtruese” që vijnë nga fuqi të mëdha si SHBA-të.
Ajo përsëriti thirrjen e saj për rihapjen pa kushte të pikave kufitare dhe hyrjen e menjëhershme të ushqimit, ujit dhe formulës për foshnje.
Autoritetet palestineze thonë se Gaza ka nevojë për 600 kamionë ndihmash çdo ditë për të përmbushur nevojat e popullsisë prej 2.4 milionë banorësh të territorit.
Të dielën, Izraeli njoftoi plane për pauza të përkohshme lokale në luftime për të lejuar shpërndarjen e ndihmave përmes korridoreve të sigurta të caktuara, pasi dhjetëra palestinezë vdiqën nga uria në enklavën e bllokuar.
Jordania tha në fillim të ditës se kishte kryer tre lëshime nga ajri mbi Gazën në koordinim me Emiratet e Bashkuara Arabe.
Kriza e urisë në Gaza është shndërruar në një katastrofë humanitare. Pamjet rrënqethëse tregojnë banorë të dobësuar rëndë, disa të reduktuar në lëkurë e kockë, duke u shembur nga lodhja, dehidratimi dhe uria e zgjatur.
Izraeli ka vendosur një bllokadë në Gaza që nga 2 marsi ka mbyllur të gjitha kalimet kufitare, duke përkeqësuar kushtet humanitare në enklavë.
