Hektarë me grurë, pyje e ara u përfshinë nga zjarri gjatë kësaj jave në disa fshatra të Istogut.
E ky zjarr shkaktoi dëme të mëdha te disa fermerë e bujq në këtë komunë.
Por këto dëme të cilat do të vlerësohen nga niveli lokal, pritet të kompensohen nga Qeveria e Kosovës.
Megjithatë, kompensimi i dëmeve nga fatkeqësitë natyrore po iu merr kohë institucioneve të vendit.
Dëmet e shkaktuara në komunën e Dragashit, as pas më shumë se një viti nuk janë kompensuar, ani pse kryetari i kësaj komune në atë kohë kishte kërkuar drejtpërdrejt kreut të Qeverisë hapa të menjëhershëm. (efekt)
E për këtë kryeministri Kurti ishte zotuar që do të bënin sa më shpejtë zgjidhje.
Por ani pse kanë kaluar më shumë se 12 muaj, kryetari i kësaj komune, thotë se nuk janë kompensuar dëmet nga vërshimet e 27 qershorit të vitit 2024.
“Jo edhe pse janë kryer të gjitha procedurat sa i përket Komisionit Komunal, edhe me të gjithë dokumentacionin që duhet sipas ligjit edhe e kemi dorëzuar në komisionin qendror të dëmeve ende nuk kemi asnjë lajm se a do të bëhet kompensimi apo jo”, tha kryetari i Dragashit, Bexhet Xheladini.
Bëhet fjalë për 1 milionë e 200 mijë euro në të cilat përfshihen dëmet e shkaktuar, në bujqësi, amvisëri, biznese si dhe në infrastrukturën publike.
E që të mos ketë vonesa të këtij lloj, nga Asociacioni i Komunave të Kosovës kanë një kërkesë.
“Neve kemi kërkuar dhe vazhdojmë të insistojmë që një vijë buxhetore niveli Qendror mund të krijojë i emëruar si fond emergjent për fatkeqësitë natyrore për komunat sepse ekziston për nivelin qendror. Kësisoj, reagim do të jetë shumë ma i shpejtë nëse ndodhë një fatkeqësi natyrore në këtë rast zjarret mirëpo në të kaluarën kemi pasur vërshimet reagimi ndaj dëmeve do të jetë shumë më i shpejtë dhe jo që kompensimi të bëhet pasi disa viteve”, tha Sazan Ibrahimi nga AKK-ja.
Televizioni ka kërkuar një sqarim nga Qeveria e Kosovës në lidhje me këto vonesa si dhe mundësinë e krijimit të një fondi të tillë por nuk ka marrë përgjigje.
