Skënderaj ishte një nga komunat e cila u prek më së shumti nga vërshimet si pasojë e reshjeve të shiut.
Këtë vlerësim e ka dhënë vet kryetari i Komunës, Fadil Nura në një prononcim për Euronews Albania.
“Kryesisht janë 10 fshatra që janë goditur, përfshirë qyteti i Skënderajt. Është dëmtuar jashtëzakonisht infrastruktura publike. Bëhet fjalë për 11 ura të shkatërruara totalisht, jashtë përdorimit. Rrugë, ekonomi familjare, biznese, ekonomi bujqësore, ku vlerësimi është 10 milionë euro dëme në total”, tha Nura.
Ai e falënderoi Shqipërinë për ndihmën e dhënë.
“Dua të falënderoj në mënyrë të veçantë kryetarin e Bashkisë së Tiranës, i cili më ka marrë në telefon dhe ka ofruar gatishmërinë. Njëkohësisht, kryeministrin e Republikës së Shqipërisë, i cili ka bërë hapa të caktuar në drejtim të ofrimit të ndihmës, përmes Forcave të Armatosura të Republikës së Shqipërisë, e cila ka ofruar gjendje gatishmërie afër kufirit me Kosovën”, theksoi Nura.
Gjatë javës së fundit, si pasojë e reshjeve të shiut përmbytje pati edhe në komuna tjera të Kosovës si Mitrovica, Istogu, Rahoveci e vende tjera.
