Shtëpia e Borë Palushaj në qytetin e Klinës u prek nga vërshimet gjatë ditës së enjte.
I gjithë kati i parë është bllokuar dhe të gjitha pajisjet dhe mobiljet janë jashtë përdorimit.
E zonja e shtëpisë e emocionuar nga ajo që ndodhi, tregon momentin se si u informua për rastin.
“Kam dëgjuar mbrëmë në ora dhjetë në mbrëmje, më kanë lajmruar, më kanë thënë shtëpija juaj është mbytë në ujë, kam qenë te familja ime por rruga ishte e bllokuar dhe nuk kemi mundur të vijë, sot erdha po çka me ardhë gjithçka është në ujë me frigorifera me makina të larjes e në dhomë të gjumit s’ki ku më hy, tmerr”, tha ajo.
Ndonëse jeton në Prishtinë, Palushaj vikendet së bashku me vajzat i kalonte në këtë shtëpi. Por tashmë, kjo do të jetë e pamundur.
“Jetoj në Prishtinë me vajzat për vikende vijmë këtu, po tash po e shihni edhe vet ju…”, shtoi ajo.
E aspak më leht nuk shpëtoi as familja e Ragip Kryeziut.
“Kemi qenë tek ura dhe e kemi parë se ka filluar me hy uji këtej në lagje dhe për pak minuta e ka vërshuar edhe fqinjin. E pashë që i ka bërë dëm kogja mirë, me ka bërë dëmë në bodrum dhe në punëtorinë time të automjeteve”, u shpreh Kryeziu.
Ai tregon rreth dëmeve që i shkaktuan vërshimet.
“Dëme diku rreth 20 mijë euro se i kam mjetet mekanike të punëtorisë që kam punuar tërë jetën…”, shtoi ai.
Përveç Klinës edhe Skenderaj, Istogu, Mitrovica e disa komuna tjera u preken nga vërshimet. Me ç’rast shumë objekte banimi, ekonomi familjare (biznese), toka bujqësore dhe shumë vetura të qytetarëve u dëmtuan në masë të madhe.
Kronika e gazetares Lendrina Kodrolli.
