Shumë zona në Kosovë janë duke u përballur më vërshime si pasojë e reshjeve të shiut të cilat kanë filluar që nga mbrëmë.
Sipas informacioneve nga institucionet zyrtare, situata me rëndë paraqitet në Gjakovë, Malishevë e Drenas.
Dhjetëra familje janë evakuuar në Gjakovë e Malishevë, ku në këtë komunë është shtyrë edhe fillimi i gjysmëvjetorit të dytë.
Ndërsa, në Drenas është rikthyer energjia elektrike pas 4 orë mungesë, por situata vazhdon të jetë e rëndë.
Siç ka njoftuar kryetari i kësaj komune, Ramiz Lladrovci, “rrugët janë ndërprerë për qarkullim në drejtim të Komoranit, te Trafoja dhe te ura e Bucollëve, vështirësi po paraqiten edhe te ura e Shtrubullovës. Dalja në magjistrale po bëhet me rrugë alternative. Qindra hektarë tokë janë të vërshuara”.
Reshjet kanë shkaktuar dëme në infrastrukturë edhe në Rahovec, ku edhe në këtë komunë disa familje janë evakuar.
Në Skenderaj situata sipas kryetarit të kësaj komune, Sami Lushtaku është e nën kontroll.
Edhe në Prishtinë situata është nën kontroll ka njoftuar kryetari i kryeqytetit Përparim Rama.
Ushtruesi i detyrës së ministrit të Infrastukturës, Hysen Durmishi ka thënë se gjendja e rrugëve, përgjithësisht, është e mirë megjithatë, kujdesi i shtuar në trafik është i domosdoshëm.
