Makineritë e rënda i nisën punimet. E kalimi në këtë pjesë tani e tutje do të jetë më i lehtë.
Kjo pasi këtu do të ndërtohen dy ura, afër asaj mbi lumin Ibër.
E për të vënë gurthemelin, aty erdhi kryeministri në detyrë, Albin Kurti, bashkë me ministrat e tij, si dhe kryetari i komunës së Mitrovicës së Veriut, Erden Atiq dhe nënkryetari i Mitrovicës së Jugut, Arian Tahiri.
Kurti tha se njëra urë është për lëvizje të qytetarëve, ndërkaq tjetra për vetura.
Kurti shtoi se edhe ajo e Ibrit do të hapet së shpejti.
Për këto punime foli edhe ministri në detyrë i MAPL-së, njëherësh Kryesues i Bordit të përbashkët të dy komunave, Elbert Krasniqi.
Ndërkaq ministri në detyrë i Infrastrukturës, Liburn Aliu, tha se vlera e këtij projekti është afër 3 milion euro.
Pas vendosjes së gurthemelit, i pari i qeverisë në detyrë, Kurti eci mbi Urën e Ibrit.
Ndërkaq gjithë këtë proces nga afër e përcollën edhe pjesëtarë të KFOR-it të cilët qëndrojnë në këtë lokacion tash e shumë vite.
Ndërsa pak para nisjes së ceremonisë, 6 persona u ndaluan për mosrespektim të urdhërave të policit, të cilëve sipas zëvendësdrejtorit të Policisë për rajonin e veriut, do t’u shqiptohet nga një tiketë për kundërvajtje.
