Komiteti Lokal për Siguri Publike (KLSP) në fshatin Cërnicë, në bashkëpunim me Koordinatorin e Projekteve për Komunitet dhe Parandalim në Drejtorinë Rajonale të Policisë në Gjilan, si dhe Njësinë e Policisë në Komunitet dhe Sektor të Stacionit Policor në Gjilan, ka realizuar projektin për vendosjen e kamerave të sigurisë në këtë fshat.
Projekti është financuar nga Organizata për Siguri dhe Bashkëpunim në Evropë (OSBE), ndërsa mbështetje ka dhënë edhe Komuna e Gjilanit, e cila ka siguruar furnizimin me energji elektrike për funksionimin e sistemit të kamerave.
Sipas Policisë së Kosovës, qëllimi i këtij projekti është rritja e nivelit të sigurisë publike, parandalimi i veprave penale, mbrojtja e pronës dhe krijimi i një ambienti më të sigurt për qytetarët.
“Vendosja e kamerave të sigurisë është mirëpritur dhe është mbështetur fuqishëm nga komuniteti i fshatit Cërnicë, i cili e konsideron këtë projekt një investim të rëndësishëm në rritjen e sigurisë dhe mirëqenies së banorëve”, thuhet në njoftimin e Policisë.
Institucionet e përfshira kanë bërë të ditur se do të vazhdojnë bashkëpunimin për realizimin e projekteve të tjera që kontribuojnë në sigurinë dhe përmirësimin e cilësisë së jetës së qytetarëve.
“Policia e Kosovës dhe Komiteti Lokal i Sigurisë – Cërnicë mbeten të përkushtuara në identifikimin dhe adresimin e nevojave të qytetarëve, me synim krijimin e një ambienti të qetë dhe sa më të sigurt për të gjithë”, bëhet e ditur në njoftim./teve1.info/
