Trupi Gjykues në çështjen “Thaçi dhe të tjerët” nesër më 16 korrik do të shpall vendimin mbi mocionin e përbashkët të mbrojtjes që kërkon rrëzimin e disa pjesëve të aktakuzës për krime lufte dhe krime kundër njerëzimit.
Lidhur me këtë, deputeti i Partisë Demokratike të Kosovës, Artan Behrami, në emisionin “Info Nata” në Tëvë1, ka thënë se dita e nesërme është një test për drejtësinë ndërkombëtare, atë evropiane dhe mbi të gjitha për Gjykatën Speciale, pasi sipas tij deri më sot ky test nuk është dhënë.
“Tani jemi në një moment i cili është shumë i rëndësishëm sepse është një moment edhe një test për drejtësinë ndërkombëtare, një test për drejtësinë evropiane, edhe një test për Gjykatën Speciale të cilin deri më sot nuk e ka dhënë, meqë deri më sot ajo në mënyrë sistematike ka shtypur të drejtat e njeriut përmes një procesi të padrejtë dhe politik përmes mbajtjes së krerëve të UÇK-së kundër Konventave Ndërkombëtare, kundër Kushtetutës e kundër ligjeve të Kosovës dhe prandaj nesër është një ditë shumë e rëndësishme”, ka deklaruar ai.
Megjithatë, Behrami është shprehur skeptik se nesër do të ndodhë ndonjë ndryshim i madh.
“Nëse shikojmë rrjedhën sesi ka funksionuar i tërë procesi deri më tani natyrisht që shpresat janë shumë të vogla që mund të ketë ndonjë ndryshim shumë të madh dhe radikal meqë Gjykata Speciale deri më sot ka rrëzuar të gjitha mocionet që mbrojtja i ka paraqitur në këtë institucion”, ka thënë Behrami.
Ndryshe, mocioni u dorëzua më 12 qershor nga mbrojtja, ndërsa Prokuroria u kundërpërgjigj më 7 korrik.
Seanca do të nisë në orën 09:00 dhe pritet të vazhdojë gjatë ditës me dëgjimin e dëshmitarëve ekspertë të Zyrës së Mbrojtësit të Viktimave.
Pavarësisht vendimit mbi mocionin, gjyqtarët kanë urdhëruar që dëshmitarët ekspertë të jenë të gatshëm, pasi sipas gjyqtarit Charles Smith – natyra e mocionit është e kufizuar dhe procesi do të kalojë në fazën tjetër të gjykimit.
