Kryetari i Shoqatës së Invalidëve të UÇK-së, Xhevdet Qeriqi, e ka cilësuar si “shokues” vendimin e Gjykatës Speciale ndaj ish-krerëve të Ushtrisë Çlirimtare të Kosovës.
Qeriqi ka thënë se pritjet e tij dhe të qytetarëve të Kosovës kanë qenë që vendimi të ishte lirues, pasi, sipas tij, nuk ka pasur elemente që do të arsyetonin dënimin e ish-krerëve të UÇK-së.
Ai ka kritikuar Gjykatën Speciale, duke pretenduar se me vendimin e saj është tentuar të njolloset lufta çlirimtare e UÇK-së.
Qeriqi është shprehur se vendimi nuk prek vetëm katër ish-krerët e UÇK-së, por, sipas tij, edhe luftëtarët e tjerë të kësaj organizate.
Duke iu referuar paraqitjes së vendimit, Qeriqi ka thënë se kryetari i trupit gjykues ka përmendur raste të aktiviteteve të paligjshme të kryera nga pjesëtarë të UÇK-së në disa komuna të Kosovës.
Sipas tij, përmendja e këtyre rasteve gjatë shpalljes së vendimit ka krijuar përshtypjen se përgjegjësia është zgjeruar përtej katër të dënuarve.
Qeriqi ka theksuar gjithashtu se, sipas tij, Gjykata Speciale është krijuar mbi bazën e presionit dhe jo si rezultat i vullnetit të qytetarëve të Kosovës.
“Për neve ka qenë një vendim shokues, pritjet e tona dhe qytetarëve kanë qenë që do të jetë vendim lirues, pasi s’ka pasur asnjë element që krerët e UÇK-së të dënohen, Gjykata deshi të më çdo kusht që ta njollosë një luftë tonë çlirimtare të UÇK-së. Ne e dimë se si është formuar kjo Gjykatë, kjo Gjykatë është formuar mbi bazën e presionit, jo mbi bazën e dëshirës sepse ne kemi qenë të bindur në luftën e drejtë çlirimtare kështu që normalisht me u përmend në emrin e qytetarëve të Kosovës, në emër të popullit ka qenë fyese edhe për neve si çlirimtar. Gjatë paraqitjes së vendimit në disa raste kryetari i trupit gjykues e ka përmend që ushtarët e UÇK-së në 12 komuna, 14 komuna kanë kryer aktivitete të paligjshme, kështu që në momentin e fundit është përfshirë komplet UÇK-ja, është përfshirë në struktura komanduese. Unë mendoj që nuk janë vetëm katërshja e UÇK-së që janë dënuar në këtë rast janë prek të gjithë luftëtarët e UÇK-së”, ka deklaruar Qeriqi në emisionin”Ditari” në Tëvë1./teve1.info/
