Për një vit, fatura e rrymës i erdhi 421 mijë euro.
Por në vitin 2025, për shpenzim të njëjtë, kjo kompani nga Suhareka, do duhet të paguaj trefishë më shumë.
Kjo pasi nga 1 qershori, Zyra e Rregullatorit të Energjisë, vendosi që kompanitë me mbi 50 punëtorë apo që kanë qarkullim vjetor më shumë se 10 milionë euro, do të dalin në treg të hapur.
Ky vendim ka qenë i pritshëm për pronarin e kompanisë “Frutex” Shaqir Palushin.
Por shton se jo edhe rritja e çmimit të rrymës deri në këtë nivel.
“Ne pak a shumë e kemi pritur që të ndodh një gjë e tillë, jemi përgatit pjesërisht por jo me një rritje trefish të çmimit që e kemi paguar deri më tani. Sipas një raportit që e kemi pranuar para dy dite dhe takimit që e kemi pasur me KESCO-n, ne gjatë vitit 2024 për energjinë e shpenzuar kemi paguar rreth 421 mijë euro dhe oferta e tyre për shpenzimin e njëjtë, do të kalojë 1 milion e 370 mijë, pra me një rritje prej 225%. Këtë rritje s’e kemi pritur”, thotë ai.
Kjo situatë e krijuar, shtyri këtë kompani që publikisht të kërkojnë alternativa të tjera.
“Ne iu kemi shkruar shumicës së operatorëve të licencuar dhe kemi marrë përgjigje negative vetëm nga dy kompani. Njëra që është e licencuar vetëm për nevoja vetanake dhe tjetra që është KEK-u që nuk ka kapacitete, për shkak se ka thënë se gjithë sasinë e rrymës që e prodhon, e shet tek KEDS. Tashmë jemi në pritje të marrim oferta të tjera nga operatorët, mund të jenë më të favorshme por jo më çmime shume më të mira”, shprehet Palushi.
Palushi ka një kërkesë për ZRRE-në.
“Për ZRRE, nëse është e mundshme të shtyhet ky vendim nga 3 deri në 6 muaj, që në të përgatitemi më shumë, pasi në shumicën e vendeve ka filluar zbatimi nga palët nënshkruese që të kalohet në treg të lirë”, është kërkesa e tij.
Ndryshe, më 2 maj grupi “Asnjë Cent Më Shumë” ka dorëzuar padi në Gjykatën Themelore në Prishtinë kundër ZRRE-së, duke kërkuar anulimin e vendimit për rritjen tarifave të energjisë.
