Pas vendimit të Gjykatës Komerciale dhe njoftimit nga Zyra e Rregullatorit për Energji (ZRrE), kompania KESCO ka njoftuar se procesi i zgjedhjes së furnizuesit të energjisë elektrike për bizneset në tregun e hapur po vazhdon sipas afateve të përcaktuara.
Për të garantuar furnizim të pandërprerë gjatë fundjavës, KESCO ka vendosur të punojë me kapacitete të shtuara deri të premten, më 15 gusht 2025, në ora 12:00, për të pranuar konsumatorët që ende nuk kanë nënshkruar kontrata.
Nga e hëna, procesi i nënshkrimit do të vijojë normalisht, në përputhje me afatet e përcaktuara nga rregullat e tregut.
“Kjo masë synon të shmangë çdo ndërprerje të furnizimit me energji elektrike për bizneset pjesë e tregut të hapur,” thuhet në njoftimin e kompanisë. KESCO u bën thirrje të gjithë konsumatorëve biznesorë që të përfundojnë procedurat pa vonesë për të siguruar vazhdimësinë e furnizimit.
