Gjykata Ndërkombëtare e Drejtësisë (GJND) pas seancës dëgjimore të mërkurës, ka dhënë vendim se Izraeli duhet të lehtësojë përpjekjet e ndihmës së OKB-së në Gaza, përfshirë UNRWA-në, dhe duhet të sigurojë “nevojat themelore” të popullsisë së Gazës.
“Si një fuqi pushtuese, Izraeli është i detyruar të sigurojë nevojat themelore të popullsisë vendase, duke përfshirë furnizimet thelbësore për mbijetesën e tyre”, tha Presidenti i GJND-së, Yuji Iwasawa.
“Gjykata rikujton detyrimin e Izraelit për të mos përdorur urinë e popullsisë civile si metodë lufte”, tha Iwasawa, citon Al Jazeera.
Në janar, Izraeli në fakt ndaloi UNRWA-n, ofruesin kryesor të ndihmës për Gazën, të vepronte në këtë territor.
Opinionet këshillimore kanë peshë të konsiderueshme ligjore dhe ekspertët thonë se çështja mund të ketë pasoja më të gjera për OKB-në dhe misionet e saj në mbarë botën.
Vendimi i GJND-së është vërtet jo-detyrues dhe nuk do t’i ndihmojë njerëzit në Gaza menjëherë, por ai shihet ende si shumë i rëndësishëm sepse ky është organi më i lartë ligjor në Kombet e Bashkuara – Gjykata Botërore.
Edhe nëse Izraeli e injoron atë, siç ka bërë vazhdimisht, të gjitha vendet e OKB-së janë të detyruara të ndjekin këshillën e kësaj gjykate.
Vitin e kaluar, e njëjta gjykatë vendosi që pushtimi izraelit i tokës palestineze është i paligjshëm dhe se të gjitha vendbanimet e paligjshme duheshin hequr. Kemi parë vende që tani thonë se po e njohin Palestinën si shtet sovran, kështu që ky është rezultati i këtyre opinioneve këshillimore.
Asambleja e Përgjithshme e OKB-së i kërkoi gjykatës vitin e kaluar të jepte një mendim këshillimor mbi detyrimet ligjore të Izraelit, pasi vendi në fjalë ndaloi agjencinë e OKB-së për refugjatët palestinezë.
Si pjesë e gjetjeve të saj, Gjykata Ndërkombëtare e Drejtësisë thotë se Izraeli nuk ka arritur të paraqesë prova se UNRWA ka punuar edhe për Hamasin, siç pretendoi ajo.
“Gjykata konstaton se Izraeli nuk i ka mbështetur pretendimet e tij se një pjesë e konsiderueshme e punonjësve të UNRWA-së janë ‘anëtarë të Hamasit… ose fraksioneve të tjera terroriste’”, tha Presidenti i GJND-së, Yuji Iwasawa.
