Në ndërtesën e Qeverisë, u mlodhën kabineti qeveritar në detyrë të enjten.
Gjatë shpalosjes së agjendës për mbledhjen qeveritare kryeministri në detyrë, Albin Kurti tha do të marrin vendime për emërime në pozita të larta drejtuese.
Këto emërime, Kurti i cilësoi si përmbyllje të punëve të nisura më herët.
“Sot do të marrim vendime për emërime në pozita ta larta drejtuese si dhe për formimin e komisioneve ad-hock apo komisioneve të përkohshme me qëllim përmbylljen e proceseve rekrutuese, të gjitha këto të filluara para datës 22 mars 2025, kur qeveria jona ka kaluar në qeveri në dorëheqje. Në këtë rast me këto vendime nuk po fillojmë procese të reja, por vetëm po i përmbyllim ato që kemi nisur e janë zhvilluar gjatë mandatit tonë të rregullt, tha kryeministri në detyrë, Albin Kurti.
Por duke marrë parasysh se Qeveria është në detyrë, njohësit e drejtësisë këto vendime I vlerësojnë si jolegjitime.
“Kjo qeveri ka pasur shumë ushtrues detyre qe gjashtë vite, nuk prish punë që edhe më tutje detyrat të vazhdohen me ushtrues detyre, përderisa edhe vet qeveria është në detyrë. Marrja e vendimeve të tilla, natyrisht që janë esenciale e me rëndësi të veçantë nga një qeveri në ikje apo në detyrë, sigurisht që kanë mungesë të legjitimitetit”, u shpreh Visar Rrecaj- avokat.
Për rrjedhojë, avokati thotë që ato edhe mund të kontestohen.
“Nga deputetët aktual dhe eksponentët tjerë politik kanë hapësirë të mjaftueshme m’u diskreditu, respektivisht m’u kërku që të anulohen. Mirëpo, tani për tani jemi në një gjendje që edhe institucione nuk ka dhe mundësi për me reflektu të tjerët qoftë edhe përmes veprimeve parlamentare është e pamundur”, tha ai.
Të emëruarit e sotëm janë Fikrije Zymberi si drejtoreshë ekzekutive në Agjencinë për arsim dhe aftësim profesional dhe arsim për të rriturit, Besa Bytyqi si drejtoreshë e përgjithshme e Inspektoratit të arsimit, Sebahate Dushani Ibrahimi drejtoreshë ekzekutive në Agjencinë e Meteorologjisë, dhe Labinot Zeqiri kryeinspektor i Inspektoratit qendror shëndetësor.
