Të shtunën luhen nëntë përballjet e xhiros së tetë në Ligën e Parë të Kosovës në futboll, me disa takime interesante që mund të sjellin ndryshime në tabelë.
Të gjitha këto 9-të ndeshje, do të nisin nga ora 15:00.
Vëllaznimi, lideri aktual i kampionatit, do të luajë para tifozëve të vet në Gjakovë kundër Besës.
Kuqezinjtë kërkojnë t’i kthehen fitoreve pas barazimit ndaj Trepçës ’89 në Malishevë dhe të konsolidojnë pozitën në krye të renditjes.
Kjo sfidë do të zhvillohet në stadiumin pranë palestrës “Shani Nushi”.
Një tjetër ndeshje me peshë është ajo mes Feronikelit dhe Tefik Çangës, ku pritet rivalitet për pikë të rëndësishme.
Në Mitrovicë, Trepça pret Suharekën, Liria do të udhëtojë në kryeqytet për t’u përballur me 2 Korrikun, ekip që mbetet i vetmi pa asnjë pikë deri më tani, ndërsa Vushtrria do të ballafaqohet me Vjosën.
Takime të forta priten edhe në sfidat tjera të javës: Trepça ’89 – KEK-u, Istogu – Rilindja, Prizreni – Dinamo dhe Ramiz Sadiku – Kika.
Me këto duele, kampionati i Ligës së Parë hyn në një fazë gjithnjë e më interesante, ku çdo pikë mund të bëjë diferencën për objektivat e skuadrave, qoftë për garën për kreun, qoftë për mbijetesën.
