Familjarët e Agon Zejnullahut kanë mbajtur protestë duke kërkuar drejtësi për djalin e tyre, i cili vdiq të hënën gjatë arrestimit nga Policia e Kosovës.
Gjatë kësaj proteste, familjarët e të ndjerit kanë kërkuar hetim të plotë dhe transparent nga institucionet e Kosovës.
Derisa, këta të fundit kanë kërkuar përgjegjësi dhe jo heshtje institucionale, duke shtuar se drejtësia e vonuar, është drejtësi e mohuar.
“Sot nuk jemi mbledhur për urrejtje, sot jemi këtu për të kërkuar drejtësi, jemi këtu për Agonin, një djalë, një jetë, një zë që nuk mund të heshtet, jemi këtu sepse drejtësia nuk është privilegj por e drejtë, jemi këtu sepse dhimbja e familjes së Agonit është dhimbje jone kolektive, sepse heshtja vret për herë të dytë. Agoni nuk është vetëm një emër, është simbol i një padrejtësie që nuk guxon të harrohet, ajo është kujtimi që na bënë që mos t’i mbyllim sytë të mos dorëzohemi të kërkojmë të vërtetën. Kërkojmë hetim të plotë dhe transparent, përgjegjësi, veprim ligjor jo heshtje institucionale sepse drejtësia e vonuar është drejtësi e mohuar. Ne protestojmë në mënyrë paqësore sepse fuqia jonë është morali ynë”, ka deklaruar Zejnullahu.
Ndryshe, më 9 korrik, pesë zyrtarëve policor të përfshirë në këtë rast u është caktuar nga Gjykata Themelore masa e paraburgimit prej një muaji.
Një ditë pas rastit, ka reaguar presidentja e Kosovës, Vjosa Osmani e cila tha se të gjitha rrethanat e këtij rasti duhet të hetohen menjëherë, në mënyrë të pavarur dhe profesionale dhe secili zyrtar që mund të ketë shkelur ligjin apo tejkaluar kompetencat duhet të vihet përpara drejtësisë pa asnjë vonesë.
Ndërkaq, kryeministri në detyrë, Albin Kurti lidhur me këtë rast ka deklaruar se nuk do të ketë strehë në institucione për këdo që ka tejkaluar kompetencat apo ka shkelur ligjin gjatë ushtrimit të pozitës zyrtare.
Për vdekjen e 27 vjeçarit, Agon Zejnullahu ka folur edhe drejtori i Përgjithshëm i Policisë së Kosovës, Gazmend Hoxha, për çka tha se nuk do të tolerojnë që në çfarëdo forme eventuale të ketë tejkalime të autorizimeve policore. Ai kërkoi nga Inspektorati policor i Kosovës dhe institucionet e tjera relevante të përdorin të gjitha burimet e nevojshme për të hetuar rrethanat e vdekjes së Zejnullahut./teve1.info/
