Dy të rinj nga Podujeva, Hana dhe Muhamed Kurtolli, kanë përfaqësuar me krenari Kosovën në Olimpiadën Ndërkombëtare STEM, e cila po mbahet në Barcelonë të Spanjës, duke u shpërblyer me medalje të merituara për suksesin e tyre të jashtëzakonshëm.
Hana Kurtolli, nxënëse e klasës 10/1 në Gjimnazin e Specializuar Matematikor, është dekoruar me medalje në këtë garë prestigjioze, ku garuan përfaqësues nga rreth 40 shtete të ndryshme. Ajo u vlerësua për njohuritë dhe përkushtimin në fushën e shkencave, duke u ngjitur në skenën ndërkombëtare me flamurin e Kosovës në duar – një moment simbolik që dëshmon talentin dhe punën e palodhshme të të rinjve tanë.
Po ashtu, Muhamed Kurtolli, vëllai i Hanës,nga Shkolla Model “Qamil Batalli” në Prishtinë gjithashtu fitoi medalje në garën ndërkombëtare të matematikës, duke e forcuar më tej prezencën e Kosovës në këtë ngjarje globale.
Ky sukses i dyfishtë nga familja Kurtolli është një dëshmi e fuqisë së arsimimit cilësor, mbështetjes familjare dhe potencialit të jashtëzakonshëm të rinjve kosovarë.
“Urime Hana! Je krenaria jonë dhe shembull për të gjithë të rinjtë që besojnë në dije dhe përkushtim!” – thuhet në një reagim nga Gjimnazi i Specializuar Matematikor.
