Komuniteti sportiv në Kosovë mori një lajm të kobshëm të premten mbrëma, pasi në moshë 59-vjeçare është ndarë nga jeta Ali Zasella, kontribuesi i madh i futbollit në Kosovë.
Zasella përveç pjesës si donator e drejtues, ai në fillet e tij ishte për një kohë të gjatë portier i skuadrës KF Birlik në vitet 80-ta e 90-ta, derisa me pas ishte edhe drejtues e donator i kësaj skuadre.
Zasella ka dhënë kontribut edhe në sportet e tjera në qytetin e Mitrovicës, ku nga viti 2008, për dy mandate katërvjeçare, ishte edhe udhëheqës i Lidhjes Rajonale të Mitrovicës, duke kontribuuar në masivizimin e futbollit dhe përmirësimin e kushteve të ambienteve sportive.
Zasellën e ka kujtuar edhe Federata e Futbollit e Kosovës:
“Me pikëllim të madh e morëm lajmin për ndarjen nga jeta të më të dashurit tuaj Ali Zasella. Ikja e hershme e Aliut nga kjo botë ka lënë zbrazëti të madhe në familjen tuaj, por edhe në familjen e gjerë të futbollit. Aliu njihej si njeri i urtë, i palodhshëm e këmbëngulës në arritjen e objektivave dhe personalitet me vlera të mëdha intelektuale e humane, andaj si i tillë do të kujtohet përherë. I lehtë i qoftë dheu i Kosovës!”, thuhet në telegramin e ngushëllimit të FFK-së.
